|
Երրորդ տուրի վերլուծություն |
|
Friday, 20 July 2012 |
 Ջերմուկում ավարտվեց կանանց Գրան-Պրի մրցաշարի երրորդ տուրը: Խաղացված 3 տուրերից հետո 2.5-ական միավորներով մրցաշարի առաջատարներն են Չինաստանի ներկայացուցիչներ Ձյու Վենջյունն ու Ռուան Լուֆեյը:
Դանիելյան-Կոներու պարտիայի ընթացքում Էլինան սկզբնախաղում կիրառեց նոր մտահղացում, այնուհետև դիրքային առավելություն ստանալու նպատակով զոհաբերեց զինվոր: Կոներուն ընդունեց զոհաբերությունը, բայց հետագայում գործեց բավականին անվստահ, ինչի արդյունքում էլ սպիտակներին հաջողվեց ստանալ նախ առավելություն, իսկ մի քանի քայլից էլ արդեն հաղթած դրություն: Ճիշտ է խաղն ավարտվեց Դանիելյանի հաղթանակով, բաըց արդարության համար պետք է նշել, որ նա չօգտագործեց հաղթանակի տանող ուղին,
30.f6?? (30.Նe8! Թc7 31.Փd5 Թd7 (եթե 31…Նd5 32.Ն1e7+-) 32.Փc4 Նe8 33.Թf7+-)
և վերջում սպիտակները հաղթեցին հավասար դրության պարագայում, մրցակցի ժամանակի սպառման պատճառով:
Բավականին կարճ ստացվեց Կովալևսկայա-Մոնղոնթուլ պարտիան: Սկզբնախաղում սպիտակներին հաջողվեց ստանալ փոքրիկ առավելությամբ անչափ հաճելի դրություն, որտեղ նրանք գործում էին շատ պարզ, հասարակ, իսկ մրցակցի կորմից պահանջվում էին միայն ճշգրիտ քայլեր: Եվ ահա դրվագներից մեկում սևերը թույլ տվեցին դիրքային վրիպում,
17…Թd7? (պետք էր խաղալ 17…Թe7 18.Փf3 Նe6 ճիշտ է, նախապատվությունը կրկին սպիտակների կողմն է, սակայն կոնկրետ ոչինչ չի երևում) 18.Թf4 Փc2 19.Նd4 Թe7 20.Նc4 Նd8 21.Նc7 Թf6 22.Ն1c2 1-0
Ռուան Լուֆեյ – Լիլիթ Մկրտչյան պարտիայի ողջ ընթացքում սպիտակները եղան խաղը թելադրողի դերում: Սկզբնախաղից հետո նրանք տիրեցին նախաձեռնությանը, այնուհետև օգտվեցին Լիլիթի փոքր ինչ պասիվ, անհաջող դիրքային խաղից
23...g6? (23…a5!? 24.Փf3 a4 ազատվելով թույլ զինվորից)
և հետզհետե ավելացնելով ճնշումը կարողացան հասնել հաղթանակի:
Մրցաշարի մեկնարկային տուրերից կարելի է ենթադրել, որ իր ոչ լավագույն մարզավիճակում է գտնվում Վրաստանի ներկայացուցիչ Նինո Խուրցիձեն: Այսօր կայացած Նինո Խուրցիձե - Ջաո Սյուե պարտիայում սևերին հեշտությամբ հաջողվեց հենց սկզբնախաղում հավասարեցնել դրությունը, որից հետո սպիտակները թույլ տվեցին դիրքային մի քանի վրիպունմեր,
13.Փb2? (13.Ձg3 Նfd8 14.Թf3 =)
իսկ չինուհին գերազանց օգտագործեց ընձեռված հնարավորությունները և աստիճաբար տիրելով նախաձեռնությանը, ավելացնելով ճնշումը՝ ի վերջո հաղթեց մրցակցին:
Կոսինցևա-Լահնո պարտիան ընթացավ բացարձակ հավասար պայքարում: Սկզբնախաղում ռուս շախմատիստուհին կիրառեց բավականին հազվադեպ հանդիպող տարբերակ, սակայն Լահնոյին դա չշփոթեցրեց, նա գործեց շատ վստահ և հեշտությամբ կարողացավ հավասարեցնել դրությունը: Այնուհետև չգտնելով առավելության տանող ուղիներ՝ կողմերը կատարեցին որոշ փոխանակումներ, որից հետո, երբ խաղատախտակի վրա կատարյալ հավասարություն էր, շախմատիստուհիները հաշտություն կնքեցին:
Սպիտակները մրցակցի համար խնդիրներ չկարողացան ստեղծել նաև Հոու Յիֆան-Ձյու Վենջուն պարտիայում: Սևերը ոչ մի դրվագում չզիջեցին նախաձեռնությունը, գործեցին բավականին սառնասրտորեն: Փորձելով սրել դրությունը աշխարհի չեմպիոնուհին զոհաբերեց զինվոր, սակայն այստեղ էլ սևերը շատ ճիշտ կողմնորոշվեցին: Մի պահ նրանք նույնիսկ կարող էին պայքարել առավելության համար,
23...Ձa5 (23...Ձd4! 24.Թb7 Նb8 25.Թa6 Ձb3 26.cb Նb3 և անկասկած նախնտրելի է սևերի դրությունը),
սակայն սևերը չօգտագործեցին այս հնարավորությունը և որոշակի պայքարից հետո խաղն ավարտվեց ոչ-ոքի:
|
